Naga-apelar si League of the Municipalities ukon LMP-Capiz Chapter President Mambusao Mayor Leodegario Labao Jr. sa alkalde sang siyudad sang Roxas nga pasugtan nga himuon nga quarantine facililty ang Capiz National High School para sa mga na-stranded nga mga seafarers sa Cebu City kag Metro Manila nga natalana nga magpauli sa probinsiya sang Capiz.
Suno kay Labao nga ginapakamaayo sang mga alkalde sa kabanwahanan nga isahon ang quarantine facility sang mga na-stranded nga mga seafarers pananglitan nga magpauli sa probinsiya.
Gindugang pa ni Labao nga mas malapit sa ospital kag iban pa nga mga pasilidad sa siyudad ang nasambit nga buluthuan.
Ginpasiguro naman ni Labao kay City Mayor Ronnie Dadivas nga wala sang may malatnan sang coronavirus disease (COVID-19) nga taga-siyudad sang Roxas kag wala sang gastuson nga pundo si Dadivas sa mga kinahanglanon sang mga seafarers.
Samtang ginpabugal ni Labao nga bukas ang banwa sang Mambusao nga magbaton sang na-stranded nga mga seafarers sa tion nga indi magpasugot si Mayor Ronnie Dadivas.
Mahibaluan nga ginaplanuhan sang provincial government nga himuon nga quarantine facility ang nasambit nga buluthuan apang wala pa sang desisyon ang alkalde sang siyudad natuhoy diri.
