ROXAS CITY – Nagapabor ang presidente sang League of the Municipalities in the Philippines (LMP)-Capiz Chapter nga kinahanglan nga magpatawag na lamang sang Provincial Development Council (PDC) meeting agud matalakay ang mga proyekto sa 20% development fund sang Annual Investment Program (AIP) 2020.
Ini ang ginpahayag ni Mambusao Mayor Leodegario ‘Jun’ Labao Jr. ang presidente sang nasambit nga grupo sang ma-interview sang Bombo Radyo.
Suno kay Labao nga wala ginkunsulta ang mga alkalde kun ano nga mga proyekto ang dapat nga ipatuman sa ila nga lugar.
Ginpanindugan ni Labao nga kinahangalan nga talakayon liwat ang mga proyekto sa mga kabanwahanan nga may yara sang duplication nga natukiban sang Sangguniang Panlalawigan agud mabaylohan ini.
Ginpalab-ot sang mga alkalde nga kun tani ginkunsulta man sila kun ano nga mga proyekto ang kinahanglan nga ipatuman sa ila nga lugar.
Gin-athag ni Labao nga wala sang ginpirmahan ang mga alkalde nga nagapabor sa mga proyekto nga ipatuman sa ila nga banwa apang ang ila nga ginpirmahan amo ang attendance sheet sa ginpatigayon nga PDC meeting.
Nagapati si Labao nga pinaagi sa pagre-convene sang PDC masulusyonan kag ma-aprubahan na ang AIP sang gobyerno-probinsiyal para sa tuig 2020.
