ROXAS CITY – Naghinyo si League of the Municipalities ukon LMP-Capiz Chapter President Mambusao Mayor Leodegario Jun Labao Jr. sa Sangguniang Panlalawigan nga maamyendahan ang Memorandum of Agreement sa tunga sang gobyerno-probinsiyal kag nasambit nga organisasyon natuhoy sa paggasto sang P1 milyon nga ginhatag ni Governor Esteban Evan ‘Nonoy’ Contreras sa mga alkalde sa probinsiya.
Suno kay Labao nga nasaad sa nasambit nga MOA nga kinahanglan gamiton sang mga alkalde ang ginhatag nga pondo para sa pagbakal sang mga personal protective equipments (PPE’s) sang mga frontliners.
Apang sunod diri, luyag nila nga mahatagan man sang insentibo ang mga frontliners rason nga dapat maamyendahan ang MOA para sa paggasto sang nasambit nga pondo.
Gintumod ni Labao si Atty. Atlas Catalan nga amo ang nagbalay sang nasambit nga MOA.
Gin-aprubahan naman sang sanggunian ang ginahinyo ni Labao kag gin-refer ini pabalik sa Office of the Provincial Governor.
