Padayon nga gina-verify sang Local Government Unit sang Panay, ang identity sang tatlo ka empleyado sang munisipyo nga ginaalegar nagpositibo sa drug test.
Sa interview sang Bombo Radyo kay Panay, Capiz Mayor Jonathan Besa, iya ginpahayag nga ginpatigayon ang surprise drug test sa tanan nga mga opisyal kag empleyado sang munisipyo bilang kabahin sang kampanya kontra iligal nga droga.
Suno kay Besa, tatlo ang nagpositibo sa masobra 300 ka mga opisyal kag empleyado nga nagpaidalom sa drug test.
Gin-athag sang alkalde nga indi regular nga mga empleyado sang munisipyo ang tatlo ka gin-alegar nagpositibo.
Pahayag pa niya, sa tion nga mabaton ang opisyal nga resulta, gilayon nga ipaidalom sa confirmatory test ang mga natungdan kag pagahatagan sang nagakaigo nga intervention suno sa nagapadayon nga proseso.
Ginsiguro man sang alcalde nga padayon kag seryoso ang kampanya sang banwa sang Panay batok sa iligal nga droga para sa malinong kag matawhay nga palibot.
