Nagpaabot sang bulig ang Local Government Unit ukon LGU sang Roxas City sa apat ka pamilya nga nadalahig sa sunog sa Sitio Cassandra, Barangay Punta Tabuc.
Sa interview sang Bombo RADyo kay Melvin Galagate, head sang Roxas Communications Group, personal nga ginbisita ni Roxas City Mayor Ronnie Dadivas ang apat ka pamilya nga nasunugan sang ila puluy-an kaina sang aga.
Kaupod sang alkalde ang mga katapo sang Department of Social Welfare and Development ukon DSWD, kun sa diin ginpaabot sa mga biktima ang una nga bulig halin sa ahensya.
Lakip sa ginpanagtag ang family food packs, kitchen kits, hygiene kits kag shelter kits.
Nagpaabot man ang City Government sang inisyal nga bulig pinansyal sa mga apektado nga pamilya.
Samtang, ginaproseso naman sang LGU Roxas City ang dugang nga bulig halin sa City Government kag National Housing Authority ukon NHA agud mabuligan ang mga pamilya sa ila pagbangon kasunod sang sunog.
