ROXAS CITY – Indi pagbawion sang Bahraingovernment ang lockdown kun padayon nga may magpositibo sa coronavirus disease 2019 (COVID-19) sa pungsod.
Sa report ni Bombo International Correspondent Edmar Lopez, sang Bergante, Mambusao, Capiz kag karon nagatrabaho bilang logistics coordinator sang isa ka kumpaniya sa Bahrain mas gin-istrikto pa sang gobyerno ang quarantine protocols para makontrol kag indi maglapta ang COVID-19 sa pungsod.
Sarado sa gihapon ang pila ka mga malls, bars kag border sang Bahrain kag Saudi Arabia.
Pila sa mga fastfood chains ang nagabaton sang take out order kag delivery order basis lamang.
Operational naman ang public transport apang mas ginhugot ang pagpatuman sang social distancing labi na sa pampubliko nga lugar.
Wala man nagakaubusan sang face mask sa Bahrain bangud isa ang ginatrabahuan ni Lopez sa mga naga-import sang face mask sa iban nga pungsod, labi na kag madamo sang order sa ila ang mga ospital.
Wala man ginpabayaan sang embahada sang Pilipinas ang mga OFWs nga nadulaan sang trabaho bangud may nabaton sila nga financial assistance gikan sa gobyerno.
Buhi man ang bayanihan spirit sa Bahrain, bangud ginabuligan sang iban nga mga Pinoy ang pila ka mga kababayan nga nadulaan sang trabaho bangud sa lockdown.
Samtang may COVID-19 hotline number ang gobyerno nga mahimo tawagan sang mga nagpositibo sa coronavirus disease 2019, sa diin gilayon sila nga buligan.
