ROXAS CITY – Labi pa nga ginhugot sang gobyerno sang Netherlands ang pagpatuman sang mga quarantine protocols agud maibanan ukon makontrol ang pagtaas sang numero sang maapektuhan sang coronavirus disease 2019.
Sa report ni Bombo International Correspondent Mark Anthony Bedeo, tumandok sang Tacas, Pontevedra, Capiz kag nagatrabaho sa Sneek, Netherlands, ginpahayag sini nga istrikto nga ginapatuman sa pungsod ang 1.5 meter nga social distancing sang kada tawo.
Off limits man ang mga bisita sa kada balay sa diin hugot nga ginapahanumdum sa mga pumuluyo sang gobyerno nga likawan ang paglagaw sa mga pampubliko nga lugar.
Sarado sa gihapon ang pila ka mga establisemento kalakip na ang mga factory sa diin ang nagapabilin nga bukas amo ang mga supermarket kag banko sa diin mahimo makapadala sang kuwarta ang mga Pinoy sa ila mga mahal sa kabuhi sa Pilipinas.
Indi mandatory ang pagsuksok sang face mask sa Netherlands, sa diin ang ila pagpati nga may sakit lamang ang nagagamit sang mask kun magguwa sa balay.
Posible man nga magbalik na sa regular classes ang mga estudyante sa Lunes kag magabukas naman ang pila ka mga establisemento.
Samtang posible man nga bawion na ang lockdown sa pungsod kun makita nga nag-flatten na ang curve sang nasambit nga pandemya sa Netherlands.
