Ginpalawig pa ang lockdown sa pungsod Cyprus tobtob sa katapusan sini nga bulan sang Abril para masiguro nga indi na magdamo pa ang numero sang mga nalatnan sang coronavirus disease ukon COVID-19.
Sa report ni Bombo International Correspondent Claire Asis tumandok sang Punta Libas, Roxas City kag apat ka tuig na nga nagatrabaho sa Cyprus bilang household service worker, kasunod sang pagpalawig sang lockdown ang mas istrikto nga pagpatuman sang mga pagsulundan nga ang sin-o man nga magalapas ang magabayad sang multa kag mapreso.
Hugot man nga ginadumili ang pagguwa sa balay kun indi lamang magbakal sang pagkaon ukon iban nga kinahanglanon kag kinahanglan nga dalhon ang quarantine pass, passport para sa mga OFWs nga nagatrabaho sa Cyprus.
Bangud diri, sila nga mga Pinoy na lamang ang nagabuligay sa diin ila ginadalhan sang pagkaon ang iban nga mga Pinoy nga indi makaguwa sa balay.
Sa istrikto nga pagsulundan nga ginapatuman sa karon sa Cyprus, ginadumilian man ang pagpadulong sa mga kaingud balay sa diin wala ginapahanugutan ang mga anak kag apo sang employer nga mabisita ang tigulang nga iya gina-atipan.
Ginpaiway man ang ginakabig nga daku nga selebrasyon sang Easter sa Cyprus sini nga bulan sang Abril kag ginadumilian ang pagpadulong sa Simbahan bilang pagsunod sa social distancing policy.
