ROXAS CITY – Ilabi pa nga ginpahugot sang lokal nga gobyerno sang banwa sang Jamindan ang ila mga lihok sa kampanya kontra coronavirus disease (COVID-19) kasunod sang pag-positibo sang duha ka mga locally-stranded individuals (LSI’s) kag isa ka returning overseas Filipino (ROF).
Ini ang ginpahayag ni Mayor Mac Arthur Valdemar sang mainterview sang Bombo Radyo.
Una diri, ginpatpat sang alkalde ang mga detalye natuhoy sa tatlo ka mga COVID-19 patients.
Isa sa ila ang residente sang Barangay Poblacion nga nag-abot sa banwa sadtong Hunyo 26 kag nagtenir sang 15 diyas sa quarantine facility antes nakaguwa sadtong Hulyo 11.
Isa ang residente sang Barangay Jaena Norte nga nag-abot sa banwa sadtong Hunyo 22 kag nagtenir sang 19 diyas sa quarantine facility antes nakaguwa sadtong Hulyo 11.
Kag ang isa ang residente sang Barangay Aglibacao nga nag-abot sa banwa sadtong Hunyo 26 kag tatlo ka adlaw lamang nagtenir sa quarantine facility bangud gin-transfer ini sa Roxas Memorial Provincial Hospital matapos ini ang nag-suprehir sang ubo kag sip-on.
Kasunod sang pag-positibo sang mga ini sa nasambit nga balatian, gilayon nga nagpakig-angut ang LGU sang banwa sa konseho sang natumod nga mga barangay para sa pagpatigayon sang contact tracing.
Ginklaro naman ni Valdemar nga lunsay ‘asymptomatic’ ang nasambit nga mga persona ukon wala sang ginabatyag nga sintomas sang balatian apang yara karon naka-hospital quarantine sa RMPH.
Gilayon man nga ginpaidalom sa ‘lockdown’ ang balay sang taga-Barangay Poblacion kag compound sang taga-Barangay Jaena Norte nga pasyente kag hugot nga ginamonitor sang Barangay Health Emergency Response Team (BHERT).
