ROXAS CITY – Nagalab-ot sa kapin P400, 000 ang pondo nga ginpain sang lokal nga gobyerno sang banwa sang Maayon para sa isolation center sang mga Person’s Under Investigation (PUI’s) kag Person’s Under Monitoring (PUM’s) bangud sang coronavirus disease (COVID-19).
Mahibaluan nga may yara sang duha ka mga isolation centers ang banwa nga nahamtang sa Maayon Rescue Development Center sa Barangay Tapulang nga sarang makaakomodar sang 24 ka mga pasyente kag sa Maayon National High School sa Barangay Poblacion Tabuc.
Mahibaluan nga 12 ka mga hulot-klasehan sa nasambit nga buluthuan ang ginpakamaayo nga gamiton bilang isolation centers.
Ini ang nakasugtan sa ginpatigayon nga sinapol sang lokal nga gobyerno sang banwa kag Inter-Agency Task Force (IATF) for COVID-19.
Sa nasambit nga pondo, ginkuha man diri ang para sa pagbakal sang mga folding beds, electric fan, lamesa, kag tangke sang tubig nga maggamit sang mga pasyente.
Apang sa pinakaulihi nga ginpaguwa nga datos sang Capiz Provincial Health Office, wala na sang may ginamonitor nga PUM’s kag PUI’s sa banwa sang Maayon.
