Nagapanawagan ang lokal nga grupo nga Amlig Antique Alliance sa pagpahalin ukon pagsuspinde sang pila ka mga road projects sa Central Panay Mountain Range (CPMR), nga nagaapekto sa mga probinsya sang Antique, Capiz, kag Iloilo. Ginpahayag sang grupo nga ang mga proyekto may peligro nga epekto sa dunang manggad kag seguridad sang mga komunidad sa palibot.
Sa interview sang Bombo Radyo kay Mr. Ramil Martinez, Communications Coordinator sang Amlig Antique Alliance, iya ginpahayag nga luyag nga pa-imbestigaran sang grupo ang pito ka proyekto nga ginapatuman sang Department of Public Works and Highways (DPWH), kun sa diin lima diri ang ginadumalahan sang Sunwest Construction Inc.—isa ka kompaniya nga naangut sa iregularidad sang flood control projects. Ang mga proyekto ang kabahin sang Panay East-West Lateral Road (PEWLR), isa ka 41-kilometer road network nga nagabalor sang ₱2.6 billion.
Nagpabutyag sang kabalaka ang grupo kag mga eksperto bangud ang Central Panay Mountain Range (CPMR) isa ka importante nga watershed kag biodiversity area sa Panay. Ang pag-utod sang kagulangan kag konstruksyon sa lugar ginapanan-aw nga makadala sang peligro nga flash floods, landslides, kag pagdula sang mga endangered species. Ang lugar ginkilala bilang Key Biodiversity Area (KBA) kag Important Bird Area (IBA), nga ginatun-an nga protektahan sa idalom sang layi.
Ginapasuni man sang mga kritiko nga ang mga proyekto indi para sa benepisyo sang mga pumuluyo kundi para maghatag sang access sa posible nga mining operations sa lugar. May yara na sang mga exploration permits ang pila ka mining firms sa Antique, Capiz kag Iloilo, rason nga ginadudahan sang mga grupo ang tuyo sang mga dalan sa mga liblib nga lugar.
Ginalakipan sang panawagan sang Amlig Antique Alliance ang pagpauntat sang mga proyekto tubtob nga may insakto nga pagtuon, pagpatigayon sang public consultations, kag pagsiguro nga may pondo para sa mas luwas kag mas mapuslanon nga mga proyekto. Gusto man nila sang mas hugot nga imbestigasyon sa mga posible nga bayolasyon sa environmental laws, lakip na ang kakulangan sang Environmental Compliance Certificate (ECC) kag ang alegasyon sang “project splitting” sang DPWH.
In an interview with Bombo Sunnie Mae Constantino Batencila
