ROXAS CITY – Suportado ni Violeta Rizon, lola sang 21-anyos nga senior high school student nga gindakup sang mga katapu sang Regional Drug Enforcement Unit ukon RDEU sa drug buy bust operation sa Sitio Bliss, Barangay Cagay sang Domingo nga adlaw, ang ginpalayag sang iya anak nga si Emok Bracamonte.
Suno kay Lola Violeta nga wala ini sa ila balay sang natabo ang ginaalegar buy bust operation sang mga pulis bangud nagpadulong sila sang iya bana sa banwa sang Ivisan.
Ginkakibot na lamang sini sang ginsugiran nga gindakup si Prince Dave bangud sa pagduso sang iligal nga droga sa diin sa ila pagpauli nagaukay na ang kagamitan sa ila balay.
Aminado man ang ginang nga nabilin pa sa ila balay si Jocelyn kag ang abyan sini nga manuglakat naman.
Ginapanindugan sang ginang nga wala sang kun anuman nga bisyo ang apo kag indi shabu ang gina-uyatan sini kundi bibliya kag gamit sa eskwelahan.
Ginkumpirma man si Lola Violeta nga sa ila nagakaon si Prince kag nagapangape sa aga bangud wala ini sang upod sa ila balay.
Apang ginpasiguro sini nga indi close ang iya apo kag si Jocelyn nga natuon na sa iya tiya bangud live-in partner ini sang iya tiyo.
Indi man makapat-ud si Lola Violeta kun may kaangtanan sa iligal nga droga si Jocelyn bangud wala niya makita ang droga.
Samtang ginbuyagyag ni Lola Violeta nga kasunod sa ginpatigayon nga drug buy bust operasyon ang pagkadula sang iya duha ka kulintas, isa ka bracelet kag relo.
Magluwas diri nadula man ang kuwarta ni Jocelyn sa bag nga nagalab-ot sa P10,000 kag P14,000 nga kuwarta sang iya abyan.
Samtang nahibaluan nga magapauli ang iloy ni Prince Dave agud matsekyar man ang kahimtangan sang iya anak nga nabilanggo sa gihapon sa karsel sang Roxas City PNP.
