Makahalangusbo ang nadangtan nga kamatayon sang isa ka 75-anyos nga lola nga ginpasibangdan nga manughiwit matapos gin-ayad ini sang hampak sang paklang sang niyog kag ginsunog sa isa ka suok nga lugar sa banwa sang Kibawe, Bukidnon.
Suno kay P/Major Jayvee Babaan, spokesperson sang Bukidnon Police, natabo ang krimen antes mag-udto sang Hulyo 26. Suno sa opisyal, ginpasibangdan sang 37-anyos nga suspect nga si alyas “Berto” ang biktima nga ginhingadlan kay Lola Mameng.
Ginbanggaan ni Berto ang tigulang nga ginpasipangdan niya nga manughiwit kag gin-ayad sang hampak sang paklang ukon sanga sang puno sang niyog.
Bangud sini, nalipong ang tigulang kag ginkuha ini nga kahigayunan sang suspek nga tambakan ang lawas sang lola sang mga mamala nga dahon sang niyog, bunot sang niyog kag iban pa nga kahoy kag ginsindihan tubtob sa masunog.
Ginapatihan nga may pulso pa ang tigulang sang sunugon sang suspect ang lawas sini.
Suno sa kapulisan, posible nga nagasupreher sang depresyon ang suspect nga ginapatihan may diperensya sa paminsaron nga nahibaluan sang ulihi nga anay drug user nga nag-surrender sa drug campaign.
Pagkaligad sang duha ka adlaw matapos ang krimen, boluntaryo nga nagsungka sa mga otoridad ang suspek.
