Isa ka ‘once in a lifetime’ nga hitabo ang nasaksihan sang mga pumuluyo sang Brgy. Suba Poblacion sa banwa sang Argao, Cebu bangud sa magarbo nga pagsaulog sang kaadlawan ni Lola Juling.
Ang magarbo nga selebrasyon sang ika-85 nga kaadlawan ni Lola Juling ang nakakuha sang atensyon sang mga pumuluyo sa banwa bangud ini ang una nga tion nga natabo ang amo sini ka magarbo nga selebrasyon.
Nahibaluan nga indi lang isa, duha, tatlo ukon bisan napulo, kundi 20 ka letchon ang ginpreparar sang mga kabataan kag apo ni Lola magluwas sa apat ka gin-patay nga baboy kag isa ka bilog nga ginpatay nga baka.
Suno sa mga nagtambong, nagabaha ang pagkaon indi lamang sa ugsaran sang balay sang birthday celebrant kundi mangin sa mga dalanon bangud nalakip man sa pagkaon ang tanan nga kaingod kag kaiping nga mga barangay.
Magluwas sa bugana nga pagkaon, ang tanan nga mga bisita nabusog, nagpamutos pa gani kag gindala sa pila ka pamilya, nga amo ang rason kon ngaa isa ini ka indi malipatan nga selebrasyon sang komunidad sa amo nga lugar.
Madamo man ang na-inspire sa sini nga selebrasyon bangud ginapakita sini nga ang matuod nga kalipay wala ginatakus sa kadamuon sang pagkaon nga ginpreparar, kundi sa pagpalangga kag pagpaambit.
Ang kaadlawan ni Lola Juling indi lamang isa ka selebrasyon sang iya edad, kundi isa ka pahanumdom nga mas matam-is ang kalipay kun ginapaambit sang bug-os nga komunidad.
