Ka-Bombo, para sa imo ano ang ginatawag nga greatest love?
Nagapati ka bala sa tinaga nga love is sacrificial?
Bangud isa ka pinasahi nga hitabo ang natabo sa Guadeloupe, France, kun sa diin isa ka 60-anyos nga lalaki ang nagpangholdap sa isa ka supermarket malapit sa istasyon sang pulis agud nga mapreso kag makaupod ang iya nga apo nga yara sa karsel.
Sandig sa mga report, ang suspek, nga isa ka anay bombero kag wala sang kun ano man nga criminal nga record, armado sang gintayaan sini sang aramas-luthang ang cashier sang nasambit nga store. Ginkuka sini ang kwarta sa cash register kag nagpangawat pa sang cheese kag ilimnon antes nga kalmado nga naglakat pabalik sa iya nga salakyan kun sa diin kaangay ginahungod sini nga madakpan sang mga otoridad.
Gilayon ini nga gindakop sang mga pulis kag ginhatagan sang abogado sang korte. Suno kay Atty. Léa Le Chevillier, ang court-appointed lawyer sang nasambit nga lolo, ginhimo sang iya nga kliyente ang krimen indi tungod sa kwarta, kundi amo ang mapreso kag mabuligan ang yara sa karsel sini nga apo.
Nag-atubang sa korte ang tigulang sa kaso nga armed robbery, aggravated assault, kag rebellion. Gin-ako sini ang mga panimangod batok sa iya. Apang, bangud sa malimpyo sini nga rekord kag maathag nga motibo sang desperasyon, nagdesisyon ang hukom nga indi ini pagpresuhon.
Sa pihak sini, ginmaduan ang tigulang nga bayadan ang mga ginpangkuha, magpaidalom sa psychological treatment, kag gindumilian nga magkadto liwat sa kasubong nga supermarket.
Ginpabilin man sang korte ang kinamatarong sini nga magbisita sa iya apo sa legal nga pamaagi kag indi na kinahanglan pa nga magpapreso para diri.
