JAMINDAN, CAPIZ – Patay ang isa ka lolo samtang pilason naman ang apo sini matapos nga matumbahan sang puno sang kahoy ang ila nga balay samtang sila ang nagakatulog sa Barangay Agcagay, Jamindan, Capiz.
Ginkilala ang napatay nga biktima nga si Corsino Balsado, 58 anyos, samtang pilason naman ang walo ka tuig sini nga apo.
Sa interview sang Bombo Radyo kay Emilio Orocio sang Disaster Risk Reduction and Management Office (DRRMO) sang nasambit nga banwa, ginpahayag sini nga mahamuok ang tulog sang mag-lolo sang hinali na lamang nga natumbahan sang puno sang kahoy ang ila balay nga nagsentro pa sa hulot kun sa diin sila nagakatulog.
Gindala pa sa ospital si Balsado apang wala ini nasalbar pa kag ginbawian sang kabuhi.
Mahibaluan nga napalibutan sang mga puno sang kahoy ang nasambit nga balay.
