Isa ka 72-anyos nga lolo sa China ang ginadayaw sang mga Chinese netizens bangud sa determinasyon sini nga ipabulong ang iya apo nga may malubha nga balatian.
Sang 2017, ang Lima ka tuig nga apo ni Zhu Yunchang na-diagnose nga may spinal muscular atrophy. Bangud sini, kinahanglan nga ibaligya sang ila pamilya ang pila sang ila mga propiedad agud makapabulong.
Ang binulan nga pension nga nabaton ni Zhu kulang man gani nangita siya sang iban nga mga ginakuhaan sang kita. Natukiban niya nga ang mangin isa ka beauty kag makeup vlogger makaganar sing daku nga kuwarta gani nagdesisyon sia nga tilawan ini.
Agud nga makagamit sang makeup sa umpisa sang vlog, nagpangayo ini sang samples sa isa ka cosmetics company apang sang nahibaluan nila nga 72 anyos ini nga lolo, nagpamalibad sila nga padal-an siya sang libre nga produkto.
Si Zhu nangisog nga magkadto sa isa ka tindahan sang makeup agud magbakal sang makeup nga gamiton sa iya vlog. Didto man siya gintudluan ang saleslady kon paano ini gamiton sang husto.
Sa una nga livestream ni Zhu, gilayon siya nga natalupangdan sang mga tumalan-aw bangud sang iya pinasahi nga kaundan. Sang nahibaluan sang mga tumalan-aw ang rason ni Zhu sa pagsuksok sang makeup, madamo nga tagipusuon ang natandog bangud himuon niya ang bisan ano agud lang mabuligan ang iya apo. Bangud sini, madasig nga nagtaas ang views sang iya mga vlogs kag nag-umpisa na ini nga mag-income sang kwarta.
Sa karon, ang pila ka bulong sang apo ni Zhu nalakip sa medikal nga seguro. Apang bisan pa nga nagnubo ang ila mga gasto sa medisina, si Zhu padayon gihapon nga isa ka beauty vlogger.
