Nakahanda ang alkalde sang banwa sang President Roxas, Capiz nga magpakig-angut sa gobyerno-probinsiyal agud mapatigayon ang pagpakaayo sang naguba nga hanging bridge sa Sitio Tabuc, Barangay Aranguel, sa nasambit nga banwa.
Ini ang ginpahayag ni Mayor Receliste Tanoy Escolin sang mainterview sang Bombo Radyo.
Suno kay Escolin, kasunod sang pagkaguba sang amo nga tulay sang nagpanalasa ang bagyo nga Ursula, nagpadala ini sang mga butong agud temporaryo nga gamiton nga lantay sa pagtabok sang mga tawo sa suba.
Apang suno sa alkalde, ‘long-term solution’ ang dapat nga himuon sa amo nga problema agud indi na magguba pa ang nasambit nga tulay pananglitan may magluntad liwat nga anuman nga kalamidad.
Aminado man si Escolin nga kasunod sang pagkaguba sang nasambit nga tulay, madamo nga residente ang nagdangop sa iya kag ginpalab-ot ang nasambit nga problema.
Indi basta-basta ang pagpakaayo sang amo nga tulay suno sa alkalde rason nga nagakinahanglan diri sang dako nga pondo.
Bangud diri, nakahanda si Escolin nga magpakig-angut sa gobyerno-probinsiyal kag sa Department of Public Works and Highways agud masolusyunan ang amo nga problema.
