ROXAS CITY – Ginaasikaso na sang Department of Justice (DOJ) ang proseso agud indi na makaguwa pa sang pungsod ang kontrobersiyal nga si Bamban, Tarlac Mayor Alice Guo.
Ini matapos pormal na nga gin-file sang Presidential Anti-Organized Crime Commission ang reklamo nga qualified trafficking bangud sa kaangtanan ni Guo sa iligal nga POGO nga Zun Yuan Technology Incorporated nga gin-raid sang mga otoridad.
Suno kay Justice Undersecretary Nicholas Ty, ginapreparar na ang Immigration lookout bulletin order nga target mapaguwa sa masunod nga semana.
Sa karon ginahulat na lamang ini nga mapirmahan ni Justice Secretary Jesus Crispin Remulla.
Ginpahayag pa ni Ty nga kinahanglan bantayan ang hulag sang mga akusado bangud ginakabig ini sila nga “flight risk” ukon posible nga magpalagyo padulong sa iban nga pungsod.
Magluwas kay Guo, 13 pa nga indibidwal ang nagapangatubang sa kaso nga qualified trafficking nga wala sang ginrekomendar nga piyansa.
