TAPAZ, CAPIZ – Love in the time of COVID-19.
Ini ang ginpamatud-an sang newly-wed couple matapos sila ang ginkasal sa border control checkpoint sa dulunan sang Iloilo kag Capiz sa banwa sang Tapaz.
Wala napunggan sang coronavirus disease (COVID-19) pandemic ang pagtambi-palad nanday Mr. and Mrs. Brian kag Elyn Fuyonan-Garino.
Natabo ang kasal nga ginpangunahan mismo ni Mayor Roberto Palomar kun sa diin nagsaksi naman ang pila ka mga frontliners sa border checkpoint.
Mahibaluan nga wala ginpahanugutan si Brian nga makasulod sa Tapaz bangud gikan ini sa Dingle, Iloilo kun sa diin siya ang nagatrabaho bilang miyembro sang Philippine Army.
Bangud diri, nagdesisyon si Brian nga pakaslan si Elyn sa mismo dulunan sang Iloilo kag Capiz.
Sa exclusive interview sang Bombo Radyo kay Elyn, ginpahayag sini nga nagdesisyon sila nga magpakasal antes niya ibun-ag ang ginadala sini nga ‘baby girl’.
Aminado ini nga nasubuan siya bangud wala ang presensiya sang ila ginikanan sa ila kasal bangud lunsay ang mga ini mga senior citizen.
Ginkompirma sini nga wala man sang reception nga natabo bangud sang pandemic gani nagpauli na lamang siya matapos ang ila kasal kag nagbalik man sa iya trabaho sa Iloilo si Brian.
Ang importante suno sa iya nga legal na sila nga mag-asawa kag nagalaom nga masaksihan sang ila mga ginikanan ang ila liwat nga pagtambi-palad sa maabot nga Disyembre sa sulod na mismo sang Simbahan.
Ginpakigbahin man ni Elyn nga nakilala sini si Brian sa isa ka public bus kun sa diin gintanyagan siya sini nga magpungko.
Gindugang pa ni Elyn nga si Brian ang pinakauna nga lalaki nga iya nangin nobyo kag ini naman ang ginakabig sini nga katapusan nga lalaki nga iya palanggaon.
