ROXAS CITY – Indi sa gihapon makapati si Ms. Jonacel Belvis nga siya ang nakapasar sa Licensure Examination for Professional Teacher 2024.
Sa interview sang Bombo Radyo kay Belvis, ginsiling sini nga tubtob subong daw kaangay nga isa lamang ka damgo ang iya nangin kadalag-an.
Suno diri, ang pagiging manunudlo ang iya nga nangin handum sumugod sang bata pa lamang ini kag ini man ang nagtulod sa iya agud padayunon ang wala natapos sang iya nga iloy.
Mahibaluan nga isa lamang si Belvis sa linibo nga mga aplikante ang nakapasar sa board exam kung sa diin nagkuha ini sang kurso nga Bachelor of Secondary Education Major in Filipino sa Capiz State University Pontevedra Campus.
Naglab-ot naman sa anum ka bulan ang iya nangin preparasyon sa pagkuha sang exam kung sa diin nag-enroll ini sa review center agud madugangan ang mga natipon nga ihibalo.
Bangud sa indi matupungan nga suporta nagikan sa iya pamilya isa man ini sa nagtulod sa iya agud magbakas nga makapasar sa amu nga pasinawan.
Plano sa karun ni Belvis nga kung may yara lamang sang opurtunidad, magatudlo na ini agud makabawi sa pamilya ilabi na sa ginhatag nga financial support sa iya.
Panugyan sini sa mga estudyante, indi paghimuon nga rason ang mga pagtilaw nga naga-abot sa kabuhi sa baylo mangin mabakod kag disiplinahon ang kaugalingon.
