Posible nga panubuon liwat sang Land Transportation Franchising and Regulatory Board ukon LTFRB ang plete sa mga pampublikong salakyan kUn magnubo ukon magpabilin nga stable ang presyo sang petrolyo sa masunod nga mga bulan.
Suno kay LTFRB Acting Chairman Greg Pua Jr., iya ginpahayag nga handa ang ahensya nga tun-an ang fare rollback kun may mag-file sang petisyon para diri.
Suno kay Pua, indi ini bag-o nga tikang bangud sang 2018, nagpatuman man ang ahensya sang pagpaubos sang plete matapos ang daku nga pagnubo sang presyo sang lana.
Madumduman nga epektibo sang Setyembre 28 ang bag-o nga minimum nga plete nga 14 pesos sa traditional jeepney kag 17 pesos naman sa modern jeepney.
Base sa inisyal nga assessment sang LTFRB, halos tanan nga pampubliko nga salakyan nagasunod na sa bag-o nga plete.
Apang nakabaton ang ahensya sang reklamo halin sa pila ka Transport Network Vehicle Service ukon TNVS drivers bangud wala pa ginapatuman sang mga Transport Network Company ukon TNC ang gin-aprobahan nga dugang nga plete.
Suno kay Pua, may sistema ang mga TNC nga ginasunod gani nga nadugayan ang pagpatuman sini.
Nagpaandam naman ang opisyal nga mahimo pangayuan sang explaination ang mga kompanya nga indi magsunod sa bag-o nga plete.
Ginpaathag man ni Pua nga indi pa kinahanglan magkuha sang bag-o nga fare matrix ang mga driver kag operator sang jeepney.
Samtang, Bastante na anay ang fare guide nga mahimo ma-download nga libre sa website sang LTFRB kag ipa-print.
