ROXAS CITY – Nagpaandam ang Land Transportation Franchising and Regulatory Board (LTFRB) Region 6 Director Richard Osmeña sa mga operators kag drivers sang Public Utility Vehicles (PUV’s) nga magapasakup sa patigayunon nga nationwide transport strike buwas nga adlaw sang Lunes, Septiembre 30, 2019, nga kanselahon ang ila nga frankisa.
Ginpahayag ni LTFRB Region 6 Director Richard Osmeña nga mandatu sang laye nga otomatiko nga kanselahon ang frankisa sang mga operators sang mga PUV’s nga magapasakup sa welga sang transport groups.
Suno sa opisyal nga klaro ang nasaad sa Memorandum Circular 2011-044, ang frankisa isa ka pribilihiyo nga ginahatag sang gobyerno kag mahimo ma-revoke kun maglapas sa pagsulundan sang ahensiya.
Ginpasiguro pa ni Osmeña nga istrikto sini nga ipatuman ang kanselasyon sa frankisa bilang pagsunod sa laye kag wala na sang luoy luoy
Nagpakig-angut na ang opisyal sa mga Local Government Units kag kumpaniya sang bus nga magabulig sa pag-asister sa ma-stranded nga mga pasahero.
Ginkumpirma man ni Osmeña nga may magalibot buwas nga adlaw nga mga indibidwal nga magapangkuha sang laragway sa magaupod sa welga sa diin magaserbe ini nga ebedensiya sa mga operators kag drivers nga naglapas sa memorandum circular sang ahensiya.
Ginpanindugan sini ang standing order ni President Rodrigo Duterte sa diin ginahimo lamang sini ang iya responsibilidad.
Samtang nahibaluan gikan kay Osmeña, may nabaton ini nga sulat gikan sa isa ka grupo sang mga operators nga nagapasiguro sa iya nga indi sila mag-upod sa transports strike.
