Nagpatigayon sang inspeksyon ang Land Transportation Office (LTO) Dumalag District Office sa mga Public Utility Vehicles (PUVs) sa Dao Terminal bilang kabahin sang OPLAN BIYAHENG AYOS para sa pagsiguro sang luwas nga pagbiyahe sang mga pasahero sa tion sang Undas 2026.
Sa pagpanguna ni Officer-in-Charge Evahnie Titular-Belloga, gin-usisa sang mga personnel sang LTO Dumalag District Office ang kondisyon sang mga pampubliko nga salakyan agud masiguro ang ila roadworthiness, kag ang pagsunod sa Republic Act No. 4136 ukon Land Transportation and Traffic Code, kaupod ang iban pa nga mga kasuguan kag regulasyon sa transportasyon.
Ang ini nga aktibidad kabahin sang pagpatuman sang OPLAN BIYAHENG AYOS: Implementation of Heightened Alert Status During Undas 2026, nga nagatuyo nga mapabakod ang kaluwasan sang mga nagabiyahe, ilabi na sa tion sang Undas nga ginapaabot ang pagdamo sang mga pasahero nga magapauli kag magabisita sa mga lulubngan sang ila mga pinalangga nga napatay.
Paagi sa sini nga inisyatibo, ginapakita sang LTO Dumalag District Office ang ila padayon nga panikasog sa pagpatuman sang mga regulasyon sa transportasyon kag pagpanalipod sa kabuhi kag kaluwasan sang publiko.
Nagapadayon man ang LTO Region VI sa pagpalig-on sang mga programa para sa kaluwasan sa dalan sa pagpanguna kag suporta ni Assistant Secretary Markus V. Lacanilao, Regional Director Atty. Gaudioso “Didoy” P. Geduspan II, kag Assistant Regional Director Jeck D. Conlu.
Ginaagda sang LTO ang mga motorista kag operator sang pampubliko nga salakyan nga mangin responsable, siguruhon nga yara sa maayo nga kondisyon ang ila mga salakyan, kag tumanon ang mga kasuguan sa dalan agud masiguro ang luwas kag malinong nga pagbiyahe sa sini nga Undas.
