ROXAS CITY – Ginhatagan sang sabat sang information officer sang Land Tansportation Office (LTO-6) ang reklamo sang mga operators kag drivers sang mga L300 van angut sa nagabiyahe nga colorum nga van sa syudad sang Roxas.
Sa exclusive interview sang Bombo Radyo Roxas kay Riza Otayde, ginpahayag sini nga ang otorisado lamang nga makapangdakup sang mga colorum nga van nga nagabiyahe amo ang LTO Regional Enforcement team.
Suno kay Otayde nga ginabug-usan sang 16 ka mga personnel sang LTO Region 6 ang nasambit nga enforcement team nga nagapadulong sa magkatuhay nga mga lugar sa Rehiyon 6.
Ginpahayag sang opisyal nga sang nagligad nga bulan lamang nagpadulong sa probinsiya sang Capiz ang enforcement team kag nagpangdakup sang ila makit-an nga colorum nga van nga nagabiyahe.
Ginapanindugan ni Otayde ang pagpangdakup sang ahensiya sa mga colorum nga van kag drivers nga nagamaneho nga wala sang lisensiya.
Naghinyo man ini sa kooperasyon sang mga operators kag drivers nga legal ang ila operasyon nga magpakig-angut sa ila bangud indi lamang sila ang pierde kundi subongman ang gobyerno.
