Ginlunsyar sang Land Transportation Office Region 6 ang Driver’s License Scholarship Program nga may tinutuyo nga maghatag sang libre nga driver education, training kag professional driver’s license para sa mga kwalipikado nga aplikante sa rehiyon.
Sa interview sang Bombo Radyo, kay Atty. Gaudioso Geduspan, Regional Director sang LTO Region 6, iya ginpahayag nga kabahin ang programa sang tikang sang ahensya agud makaproduce sang disiplinado kag dekalidad nga mga driver kag mapalig-on pa ang road safety sa Western Visayas.
Suno kay Geduspan, ginpili ang Western Visayas bilang pilot region para sa nasambit nga programa suno sa direktiba sang liderato sang LTO.
Pahayag pa niya, ang mga napilian nga scholars sang first batch magaagi anay sa theoretical kag practical driving courses antes mabaton ang ila professional driver’s license.
Samtang, natalana naman nga ilunsyar ang pilot rollout sang programa sa Mayo 27, 2026 .
