ROXAS CITY -Nagpasalig ang Land Transportation Office-Roxas City District Office kag Sangguniang Panlungsod nga magapadala sang sulat kag resolusyon sa Land Transportation Office Region 6 nga ipaiway ang implementasyon sang Bawal Angkas sa siyudad sang Roxas.
Ini ang ginpahayag ni Field Officer Warren Dureza sang mainterview sang Bombo Radyo.
Ginpahayag ni Dureza nga nagkasugot ang LTO Roxas City District kag SP nga ipaiway ang implementasyon sang Bawal Angkas sa mga magpamilya nga naga-angkasanay sa motorsiklo bangud verbal pa gid lamang ang ginkasugtan sang magtimbang nga bahin sang tinalikdan nga sinapol.
Gindugang pa ni Dureza nga nahangpan sang LTO Roxas City District ang luyag nga ipalab-ot sang konseho sang siyudad nga indi mahimo nga madumilian nga mag-angkasanay ang magpamilya bangud isa lang sila ka balay nga ginapulian.//
Magluwas diri suno kay Dureza nga numero uno nga ginagamit nga transportasyon sa siyudad amo ang motorsiklo bangud sa kakulangan sang pampubliko nga salakyan nga nagabiyahe.
Ginpasalig man sang SP suno kay Dureza nga mangin isa ang executive order nga ginapatuman sang provincial government kag city government angut sa nasambit nga polisiya.
Samtang ginpasalig ni Dureza nga wala sang dakpanay nga matabo sa siyudad samtang wala pa maaprubahan sang LTO Regional Office ang hinyo sang talatapan kag sang Sangguniang Panlungsod.
