Gin-athag sang LTO Roxas District Office nga wala sang pinilian sa pagdakop batok sa mga motorista nga nagalapas sa layi sa dalanon.
Sa interview sang Bombo Radyo, ginpahayag ni Atty. Allan Sacramento, OIC Chief sang LTO Roxas District Office, nga apisar may yara sang kakulangan sa ila manpower, ginahimo gihapon sang ila opisina ang tanan nga pamaagi agud mapatuman ang responsibilidad sang ahensya.
Suno kay Sacramento, aminado ini nga may mga sitwasyon nga indi nila ma-akomodar ang tanan nga kinahanglan nga aksyon bangud sa kakulangan sang personnel apang indi buot silingon nga may ginapili sila sa pagpatuman sang layi ukon may ginahatagan sang espesyal nga pagtrato.
Pahayag pa niya, ginahimo sang LTO Roxas District Office ang ila mandato nga magpatuman sang mga regulasyon sa dalanon agud masiguro ang kaluwasan sang publiko kag malikawan ang mga aksidente nga mahimo matabo bangud sa paglapas sang iban nga motorista sa traffic laws.
Nagapadayon man ang ila koordinasyon kag pagpakig-angot sa mga katapo sang Traffic Management Unit kag Highway Patrol Group agud mapadasig kag mapasangkad pa gid ang pagserbisyo sa publiko ilabi na sa pagpatuman sang mga layi sa dalanon.
Nagalaum man ang natungdan nga mas mapabaskog pa gid ang kampanya batok hugot nga pagdakop sa mga nagalapas sa traffic rules kag masiguro nga mas mangin organisado kag mas safe ang dalanon para sa tanan nga motorista kag pedestrian.
