ROXAS CITY – Wala pa man sang detalye ang natalana nga lubong sang napatay nga si Kobe Bryant ukon ang ginbansagan nga ‘Black Mamba’, ginalauman na sang mga taga-Amerika nga mangin ‘historic’ ini ukon makasaysayan.
Ini ang ginpahayag ni Bombo International Correspondent Raffy Fernando, tumandok sang Capiz kag nakaba-se karon sa Northwest, Indiana, USA sa iya nga report sa Bombo Radyo Roxas.
Suno diri nga wala-tuo ang pamaagi sang mga Americans sa pagpakita sang ila nga pagpakig-unong sa pagkamatay ni Bryant.
May pila sa mga ini ang nagahalad sang bulak kag kandila, may mga nagasuksok sang jersey’s nga may numbers 8 kag 24, may yara man sang mga lugar nga ginpuno sang puple kag gold nga suga nga nagasimbolo sang duag sang Los Angeles kun sa diin ginsuguran kag gintapos ni Bryant ang iya nga 20-season NBA career.
Nagapadayon naman ang imbestigasyon sang mga Federal investigators agud matumod kun ano ang gintunaan sang helicopter crash nga nag-utas sang kabuhi sang NBA super star kag 8 ka iban pa kalakip ang anak sini nga si Gianni.
