Pagahatagan sang warning signs ang suba sa Sitio Pangpang, Barangay Agbalo, Panay, Capiz matapos mapukaw ang pagtalupangod sang mga barangay officials sa peligro nga ginatuga sini sa mga pumuluyo nga nagaagi sa lugar bilang shortcut pakadto sa ila mga puluy-an.
Suno kay Punong Barangay Roderick Gabasa sang Brgy. Agbalo, masami nga ginaagyan sang mga pumuluyo, lakip na sang mga kabataan, ang nasambit nga bahin sang suba agud mapadali ang ila pagpauli, ilabi na halin sa Sitio Pangpang pakadto sa Barangay Magubilan.
Ginpahayag ni Gabasa nga may mga insidente na sang pagkalumos nga natabo sa amo nga suba, gani ginakabig ini nga dapat hatagan sang mas daku nga pagtalupangod sang publiko.
Dugang pa sang natungdan, nagaplano ang Barangay Agbalo kag Barangay Magubilan nga magbutang sang mga warning signs sa palibot sang suba agud mapahanumdom ang mga pumuluyo sa peligro sang pagtabok, ilabi na kon gab-i.
Nagapangabay man si Gabasa sa mga residente, labi na sa mga kabataan, nga maghalong kag likawan ang pagtabok sa suba kon indi kinahanglan, ilabi na kon madulom na.
Samtang, padayon man ang pagpakig-angot sang mga barangay officials sa mga pumuluyo agud mapalapnag ang kaalam tuhoy sa seguridad kag malikawan ang posible nga mga insidente sa amo nga lugar.
