ROXAS CITY – Liwat nga gindeklarar nga kampeon ang Barangay Milibili sa Lupong Tagapamayapa Regional Incentives Awards Committee sang Department of Interior and Local Government (DILG).
Ini ang ginkumpirma mismo ni Barangay Kapitan Midelo Ocampo, Chairman sang Lupong Tagapamayapa sang nasambit nga barangay.
Suno kay Ocampo nakabaton sila sang notisya gikan sa DILG Provincial Office nga nagapalab-ot sang nangin kadalag-an sang nasambit nga barangay.
Nahibaluan nga ini na ang ika-tatlo nga kahigayunan nga naangkon sang Barangay Milibili ang nasambit nga pasidungog sa Regional Level.
Ginpasalig naman ni Ocampo nga padayon sa gihapon ang suporta sini sa Lupong Tagapamayapa sang Barangay Milibili sa pihak nga masako na ini sa pagpangampanya sa mga kabarangayan sa syudad.
Samtang nagalaum si Ocampo nga madepensahan ang pasidungog sa National Level kag liwat maangkon sa ikaduha nga kahigayunan ang nasambit nga pasidungog.
Matandaan nga defending champion ang Barangay Milibili sa Lupong Tagapamayapa National Incetives Award sang nagligad nga 2018.
