Nagsaka na sa masobra 7,600 ka mga Overseas Filipino Workers (OFWs) kag ang ila mga pamilya ang madinalag-on nga mapauli sa Pilipinas halin sa Middle East sa idalom sang padayon nga repatriation program sang national government.
Base sa pinakabag-o nga report sang Department of Migrant Workers (DMW), luwas nga nag-abot kahapon sa Ninoy Aquino International Airport (NAIA) Terminal 3 ang pinakaulihi nga grupo nga ginlakipan sang 36 ka OFWs kag duha ka dependents.
Ang grupo nag-abot sa Pilipinas sakay sang nagkalain-lain nga commercial flights.
Pag-abot pa lang sa airport, gilayon sila nga ginsugata sang mga opisyal sang DMW kag Overseas Workers Welfare Administration (OWWA).
Ini ang kabahin sang una nga bulig sang gobyerno, nakabaton sila sang pinansyal nga ayuda, libre nga transportasyon pauli sa ila tagsa ka probinsya, kag temporaryo nga tulogan para sa mga nagakinahanglan.
Sa kabug-osan nga datos sang DMW halin Marso 5 tubtob Abril 25, 2026, naglab-ot na sa 7,674 ka OFWs kag dependents ang nakapauli na sa Pilipinas. Sa sini nga numero, 7,051 ang direkta nga ginpapauli pinaagi sa libre nga serbisyo kag pondo sang gobyerno.
Ginpasiguro sang mga natungdan nga ahensya nga indi mauntat ang repatriation kag reintegration programs.
Dugang sini nga masiguro nga mapalayo ang mga Pilipino sa bisan ano nga peligro sa iban nga pungsod, kag mahatagan sila sang bag-o nga pangkabuy-anan sa ila pagbalik sa Pilipinas.
