ROXAS CITY – Nakabatyag sang kalipay ang pamunuan sang Maayon Elementary School sa banwa sang Maayon sang nagpadulong ang hubon sang Bombo Radyo Roxas para magpasakop sa Brigada Eskwela 2019.
Ini ang ginpahayag ni Officer in Charge Dr. Fe Bañes sang mainterview sang Bombo Radyo.
Suno kay Bañes nga nalipay sila bangud ginpadulongan kag ginhatagan sang oras sang Bombo Radyo ang nasambit nga aktibidad pinaagi sa paghatag sang pinta sa buluthuan apisar nga malayo pa ini sa siyudad sang Roxas.
Magluwas sa Bombo Radyo, padayon man ang pag-alabutan sang mga bulig gikan sa magkatuhay nga ahensiya sang gobyerno, stakeholders kag mga pribado nga grupo ukon indibidwal.
Tuman man ang pagpasalamat sang pamunuan sa mga manunudlo, estudyante kag mga ginikanan nga nagabulig sa pagtinlo kag pagpatahum sa ila nga eskwelahan.
Ginpahayag man ni Bañes nga 75 porsyento na ang ila natinloan sa ila nga eskwelahan.
Nahibaluan nga ila ginatutukan sa karon ang pagpakay-o sang mga bangko kag lamesa subongman ang mga hulot-klasehan nga gamiton sang mga estudyante kag mga manunudlo sa pagbukas sang klase.
Samtang, nagalaom naman ang pamunuan sang eskwelahan nga pagkatapos sang brigada eskwela 2019 mangin matahum kag handa na ang nasambit nga buluthuan sa pagbukas sang klase.
