PILAR, CAPIZ – Nangin mabakod ang ebidensya nga video kun sa diin makit-an ang SK Chairman, duha ka BPAT member kag mismo ang tag-iya nga nagbitay kag brutal nga nagkastigo sang ido sa Barangay Blasco, Pilar, Capiz.
Matandaan nga Mayo 8, 2024 nag-trending online ang pagmaltrato sang mga akusado sa ido nga ginhigot kag ginsapute pinaagi sa pagbakbak sang kahoy tubtob nga ginbawian ini sang kabuhi.
Sa interview sang Bombo Radyo kay Capiz Animal Welfare Advocates, Inc. President Atty. Ann Margaret Dy, ginpahayag sini nga magluwas sa video, antes paman gin-file sa fiscal ang kaso may panaysayon na ang mga akusado nga ginaako nila ang ila gin-ubra nga pagpangkastigo-patay sa amu nga ido.
Nobyembre 8, 2024 nagguwa ang desisyon sang korte batuk sa apat ka mga akusado nga nagpangatubang sa kaso nga paglapas sa Animal Welfare Act kag may penalidad nga P10,000.
Pahayag pa ni Atty. Dy nga magaserbe ini kuntani ini nga awareness sa publiko nga may ara sang layi kag mahimo gid nga makasuhan ang isa ka indibidwal nga nagapanakit sa sapat kaangay sang ido kag kuring.
Panugyan pa sini nga kun may makit-an nga ido nga nasuspetsahan nga may rabies mag-report gilayon sa mga natungdan ukon sa Municipal Agriculturist kag indi magdesisyon nga sila ang mapatay bangud may ginasunod nga procedure.
