ROXAS CITY– Madamo nga mga residente ang na-stranded kag wala nakaguwa sa ila mga balay bangud sa flashflood ukon pagbaha sa Barangay San Antonio, Cuartero, Capiz.
Ini matapos wala untat ang pagbubo sang ulan sa nasambit nga banwa.
Sa interview sang Bombo Tadyo kay Municipal Disaster Risk Reduction and Management Office (MDRRMO)- Officer Ronald Guillermo, ginkakibot sang mga residente ang hinali nga pagtaas sang lebel sang tubig nga nag-awas gikan sa suba.
Indi man maagyan sang mga salakyan ang dalan nga nagakonekta sa banwa sang Cuartero kag Maayon bangud apektado ini sang pagbaha.
Samtang ba-se sa pinakaulihi nga report sang PDRRMO-Capiz, masobra sa napulo ka barangay ang ginabaha.
Kaangut sini, ginpasiguro sang ahensiya nga padayun ang ila nga monitoring sa mga ginabaha nga barangay subongman sa mga apektado nga mga pumuluyo.
