ROXAS CITY – Ginpakigbahin sang isa ka basketball coach sa probinsya ang iya sini opinyon natuhoy sa nangin resulta sang hampang sang Gilas Pilipinas batok sa Dominican Republic sa imbukada sang FIBA World Cup 2023, kahapon sa Philippine Arena.
Suno kay Coach Ramon Buhat, may pila ka mga rason ini nga nakit-an sa hampang sang Gilas, una na diri, ang pagpermi sang bola kay Jordan Clarkson kag madamo nga turnover.
Pahayag sini, daku nga factor sa basketball ang pagpasahay sang bola agud indi ma-focus sa isa lamang ka player ang depensa kag mahatagan sang tsansa ang iban nga player nga maka-puntos.
Wala man suno diri, nagakahulugan nga bangud si Clarkson ang star player, solo niya na lang nga pagadal-on ang bug-os nga team sang gilas.
Dugang pa ni Buhat, nga kanugon man ang mapuntos kuntani sa freethrow kun nagasulod lang ang tira sang mga players.
Wala man nakalusot sa iya ang pigado nga decision making sang coach sang Gilas kag kuntani ginhatagan sang tsansa ang iban nga players nga maghampang kasubong kay Kai Sotto nga naghampang lamang sang masobra 1 ka minuto.
Nagapati ini, nga bangud sa kaatason kag talento ni Sotto daku ang mabulig sini sa hubon pag-abot sa depensa.
Aminado si Buhat nga kulang sa agresibo si Sotto indi kaangay ni Renz Abando nga ginalagas ang bola, isa ka mentality nga dapat maangkon sang isa ka basketball player.
Samtang, na notisyaran man sini ang indi consistent nga desisyon sang referee.
Sa pihak sini, gindayaw ni Buhat ang maayo nga performance nanday June Mar Fajardo kag Dwight Ramos.
Matandaan, ginlutos sang Dominican Republic ang Gilas sa iskor nga 87-81.
