Nagpaguwa sang nanari-sari nga reaksyon ang world leaders kag international aid agencies anugt sa kasugtanan para sa ceasefire sa tunga sang Israel kag Hamas sa Gaza.
Ginpahayag ni Spain Prime Minister Pedro Sanchez nga tuman ka bilidhon ang ceasefire deal sa regional stability kag kinahanglanon nga tikang sa paglab-ot sang two-state solution.
Ginpasalamatan man sini ang Qatar, Egypt kag US nga amu ang nagserbe nga mediators agud matuman ang untat-lupok sa tunga sang Israel kag Hamas.
Suno naman kay Belgium Prime Minister Alexander de Croo, nakahanda ang Belgium nga magbulig kag nagalum nga ini na ang panugod sang padayon nga kalinungan.
Ginpabutyag naman ni European Commission President Ursula von der Leyen nga nagadala sang paglaum ang kasugtanan para sa bug-os nga rehiyon kag ginhaylo ang magtimbang nga bahin para sa dalayon nga pagtuman sa ceasefire.
Gintawag naman ni Australian Prime Minister Anthony Albanese ang kasugtanan bilang isa ka konstruktibo sa regional stability kag nagalaum nga makahatag ini sa mga pumuluyo sang Palestine sang kahigayunan agud liwat nga makabangon, kaayuhon ang ila nga gobyerno kag iduso ang self-determination.
Sa isa naman ka interview, ginpahayag ni United Nation Secretary-General Antonio Guterres, handa ang UN nga suportahan ang kasugtanan kag palapnagon pa ang wala untat nga humanitarian relief sa mga Palestino nga padayon nga nabudlayan bangud sa halit nga gindulot sang giyera.
Ginsiling naman ni Turkish Foreign Minister Hakan Fidan nga isa ka isa ka bilidhon nga tikang ang ceasefire deal para sa regional stability. Bangud sini, magapadayon suno sa iya ang mga ginahimo nga pagpanikasog sang Turkey para sa 2-state solution sa conflict sa tunga sang Israel kag Palestine.
Sa bahin naman sang Qatar nga isa sa mga mediator sa ceasefire deal, nagapanawagan si PM Sheikh Mohammed bin Abdulrahman Al Thani sa magtimbang nga bahin sa kalinungan sa Gaza strip sumugod subong tubtob sa mangin dalayon na nga mangin epektibo ang kasugtanan sa Dominggo, Enero 19.
Ginhatagan naman sang pagtamod ni Egyptian President Abdel Fattah el-Sisi ang importansya sang madasig nga pagdul-ong sang humanitarian aid sa Gaza.
Pahayag naman ni Mohammad Bagher Ghalibaf, parliament speaker sang Iran nga dapat silutan ang gintawag sini nga “criminal regime” kag para sa pag-ayo sang pilas nga gintuga sang giyera sa pumuluyo sang Palestine.
Ginpunto naman ni United Arab Emirates Foreign Minister Sheikh Abdullah bin Zayed bin Sultan Al Nahyan ang importansya sang pagtuman sang Israel kag hamas sa ila nga commitments para matapos na ang pag-antos sang mga priso nga Palestino kag bihag nga Israelis.
