ROXAS CITY – Nagtuga sang kakugmat sa mga apektado nga residente ang naeksperyensiyahan nga gulpi nga pagtaas sang tubig baha sa San Esteban Village sa Barangay Rizal, Pontevedra, Capiz.
Sa interview sang Bombo Radyo kay Thelma Balmos, kapin 4 na ka tuig nga nagapuyo sa amu nga housing unit, suno diri bangud sa blk. 1 ini nahamtang, indi na bag-o sa ila nga magbaha-baha kada magbubo ang mabaskog nga pag-ulan, apang ginkakibot nila ang nagluntad nga baha kaina sang kaaganhon kun sa diin naglab-ot na sa ila hawak ang tubig sa sulod sang ila unit kag taga-liog naman sa pinakamadalom nga porsyon sang ila lugar.
Nahibaluan nga apektado sang pagbaha ang Blk. 1, 2, 3 kag 19, kun sa diin may yara sang 1,150 ka mga units ang nasambit nga pabahay.
Sa interview naman sang Bombo Radyo kay Punong Barangay Naomi “Mimi” Dumagpi sang Brgy. Rizal, suno diri, ginkakulba man sini ang nagluntad nga pagbaha sang Oktubre 20 kag subong nga 29 bangud indi normal ang kadalumon sang tubig kag posible nga mas magalala pagid ang mga masunod nga pagbaha sa amu nga housing.
Ginpalab-ot naman ini nila sa ila LGU apang wala sa gihapon sang aksyon.
Aminado man ang Kapitana nga iresponsable nga paghaboy sang basura sang mga residente ang rason sa madasig nga pagtaas sang tubig baha, dugangan pa sang magamay nga buho sang drainage system rason sa pagbara sang mga basura kag ang epekto sang pag-utod sang kahoy sa mga kabukiran.
Nagapatigayon man sila sang clean-up drive sa lugar apang indi ini sa gihapon sang bastante.
Panawagan sang Opisyal nga mangin responsable ang mga pumuluyo sa ila basura bangud sila sa gihapon ang naga-penitensya sa ila ginaubra.
