ROXAS CITY – Ginbawian sang kabuhi ang tatlo ka indibidwal samtang kritikal ang 2 matapos gin-arado sang pick-up ang ginasakyan nga mga motorsiklo takna 1:50 kaina sang kaaganhon, Disyembre 10 sa Arnaldo Boulevard, Barangay Baybay Roxas City.
Ginkilala ang mga napatay nga sanday Joshua Doronio, 18-anyos residente sang Barangay East Villaflores, Maayon, Cedric Andrei Baes, residente sang Barangay Poblacion Tabuc, Panay kag Justine Deneo Villareña, residente sang Barangay Chiquito, sang nasambit nga banwa, lunsay naga-edad 16-anyos.
Samtang ang mga kritikal amu sanday Joshua Albert Lanado, 19-anyos kag Joshua Burata, 17-anyos, sang banwa sang Panay.
Sa impormasyon nga nakuha sang Bombo Radyo sa Roxas City PNP, samtang ginasubay sang tatlo ka motorsiklo ang dalanon nagikan sa Barangay Baybay padulong sa Roxas City proper sang hinali na lang nabungguan ang mga ini kag gin-arado sang nagasunod nga Strada nga pick-up nga ginamaneho ni Jerex Diawara, 30-anyos residente sang Katipunan Village, Barangay Lawaan.
Bangud sini, lunsay nagkalatumba ang mga motorsiklo kabangdanan agud mag-angkon sang patal nga mga pilas ang mga biktima.
Lunsay ginpadangat ang mga ini sa magkatuhay nga ospital apang ginbawian sang kabuhi si Doronio, Villareña kag Baes.
Samtang padayon naman nga ginabulong sanday Lanado kag Burata.
Ginapahayag yara sa impluwensya sang makahulubog nga ilimnon si Diawara sang natabo ang insidente.
Wala naman napilasan si Diawara kag nagapabilin sa karon sa kustodiya sang kapulisan samtang nagapadayon pa ang imbestigasyon angut sa insidente.
