Dead on arrival ang duha ka mga persona matapos ang natabo nga aksidente sa National Highway sang Barangay Nasunugan, Dao, Capiz takna alas 6:07 subong nga gab-i.
Ginkilala ang mga biktima nga sanday Cloe Miguel Luciano Feril, 20 anyos nga residente sang Barangay Sta. Carmen, Dumalag kag Ryan Lapidez Crisosto alyas ‘Nono’, 21 anyos sang Barangay Pinamalatican, Sigma, Capiz.
Base sa inisyal nga imbestigasyon sang Dao Municipal Police Station, ginasubay sang duha ka mga biktima ang dalanon padulong sa banwa sang Dumalag sakay sa Suzuki Smash nga motorsiklo sang aksidente ang mga ini nga nabungguan sang kasumalang nga Toyota Wigo nga ginamaneho ni Dr. Quence Dolor Trifalgar, 34 anyos, isa ka doktor sa Roxas Memorial Provincial Hospital (RMPH) nga residente sang Jaro, Iloilo City.
Nagaguwa sa imbestigasyon nga magapadulong sa syudad sang Roxas si Trifalgar sang nag-overtake ini sa isa ka salakyan apang nadulaan sang kontrol sa pagmaneho rason nga nabungguan ang kasumalang nga motorsiklo nga ginasakyan sang duha ka mga biktima.
Madasig nga gindala ang mga biktima sa Sen. Gerardo M. Roxas Memorial District Hospital apang gindeklarar nga DOA sang doktor.
Mahibaluan nga nag-angkon sang patal nga pilas sa ulo ang mga biktima.
Gindala naman sa Mambusao District Hospital ang driver sang salakyan matapos nagbatyag sang pagpalanakit sa lawas.
