TAPAZ, CAPIZ – Nasapwan nga wala na sang kabuhi ang mag-amay nga ginapatihan ginluthang sa sulod mismo sang ila nga balay sa Barangay San Roque, Tapaz, Capiz.
Ang mga biktima amo sanday alyas “Jun,” 58-anyos, may asawa, kag alyas “Mar,” 26-anyos, isa ka Person with Disability (PWD) kag lunsay mga residente sang nasambit nga lugar.
Sa interview sang Bombo Radyo kay PCAPT Joebert Delos Reyes, Hepe sang Tapaz Municipal Police Station, alas 9:20 sang aga sang Hulyo 28, nagpadulong sa balay sang mga biktima sanday alyas “Tile” kag alyas “Ron,” mga BPAT member agud hambalan si “Jun” angut sa ulubrahon sa bukid. Diri nila nadiskubre ang mga dugo sa idalom sang salog nga kawayan sang balay, rason agud gilayon sila nga magpangayo sang bulig.
Sa pagpadulong sang kapulisan, nasapwan ang mga biktima nga nagahigda sa sa sulod sang ila nga balay kun sa diin si alyas “Jun” may igo sang bala sa ulo, samtang si alyas “Mar” nga iya anak ang may igo sa nawong.
Narekober sa crime scene ang duha ka basiyo sang bala kag isa ka slug sang kalibre .45 nga armas.
Base naman sa panaysayon sang BPAT member nga si alyas “Ron,” nakabati siya sang mga lupok sang aramas ala 1:00 sang kaagahon sa pareho nga petsa.
Padayon ang imbestigasyon sang mga otoridad sa nasambit nga insidente.
– Reported by: Bombo Jessa Mae Siman De Los Santos
