ROXAS CITY – Pilason nga ginpadangat sa ospital ang mag-amay matapos aksidente nga nabungguan sang ginamaneho nga motorsiklo ang Mitsubishi Montero Sport nga salakyan sa Barangay Baybay, sining syudad.
Ginkilala ang mga biktima nga sanday Leonel Apinan kag lima ka tuig nga anak nga babaye,lunsay mga residente sang Barangay Culasi, Roxas City nga nag-angkon sang pilas sa magkatuhay nga bahin sang lawas.
Sandig sa imbestigasyon sang kapulisan, nagapauli na ang mag-amay nga Apinan sang gin-alegar nga nadulaan sang kontrol ang ginamaneho nga motorsiklo kag aksidente nga nagbunggo sa kasugata nga salakyan nga ginamaneho ni Mario Berjamin 62-anyos sang Barangay Banica, sining syudad.
Una nga gindapatan sang pagbulong ang mag-amay sang nagresponde nga mga katapu sang Roxas City Emergency Response Team (RCERT) antes gindala sa ospital para dapatan sang dugang nga pagbulong.
