ROXAS CITY – Pilason ang mag-amay matapos ang nagluntad nga kinagamo sa Sitio Kabulakan, Barangay Cogon, Roxas City.
Ginkilala ang mag-amay nga sanday Ruel Montecino, 32-anyos kag Rodolfo Montecino 59-anyos lunsay mga residente sang nasambit nga lugar.
Suno kay Lucille Guanzon, 36-anyos, himata sang nasambit nga mga persona nga yara sa idalom sang impluwensya sang makahulubog nga ilimnon si Ruel kag nagtuga sang kinagamo sa ila balay rason nga ginsaway ini sang iya amay nga si Rodolfo.
Bangud diri, naglakat si Ruel apang sa pagbalik sini may dala na ini nga steel bar kag hinali na lamang ginlampos sa iya amay.
Nagbalos man ang iya amay pinaagi sa paglabo gamit ang bolo.
Nag-angkon naman sang mga kasamaran sa lawas ang duha sa diin gilayon man nga gindala sa ospital kag padayon sa karon nga ginabulong.
