ROXAS CITY – Ginklaro sang 55-anyos nga mister nga wala sang kamatuoran ang blotter sini sa Roxas City Police Station natuhoy sa pag-upod sang iya misis sa iban nga lalaki sa Barangay Li-ong, Roxas City.
Ini matapos nga pila ka adlaw wala nakapauli sa ila balay ang iya nga misis.
Sa interview sang Bombo Radyo kay Rogelio Deviente nga hubog ini nga nagkadto sa Roxas City PNP kun sa diin ginapahayag nga magkaupod sila sang iya bayaw nga si Cherry nga amo ang nagsulat sang blotter report sa mga kapulisan.
Aminado si Deviente nga wala na sini ginbasa ang blotter report nga ginsulat sang iya bayaw bangud nagpirma lamang.
Apang, ulihi na sini natukiban sang nabatian sang pila sini ka himata sa radyo ang nasambit nga report.
Matandaan nga sandig sa ginpabalhag sang tagreklamo ginaalegar sini nga ginsugiran ini sang iya pakaisa nga ang iya asawa nga si Ginalyn Deviente ang nakita nga nagpauli sa balay ni Regie Gakol.
Nagpadulong si Deviente sa balay ni Gakol kag diri nakompirmar nga yara ang presinsya sang iya asawa.
Gintinguhaan pa nga maghusay ang magtimbang nga bahin apang nagpamalibad na lamang ang iya sini nga misis.
Apang, sa ulihi hugot man nga ginpanginwala ni Deviente ang natabo.
Suno naman kay Ginalyn, wala sila nagbulagay sang iya nga bana kabaliskaran sa ginpa-blotter sang iya utod kaupod ang iya nga mister.
Nagpamatuod man ini nga posible wala gidman nabasahan sang iya mister ang blotter report kag ini ang nagpirma gid lamang.
Ginklaro man sini nga wala siya nag-upod kay Gakol apang nagpadulong lamang ini sa balay sang iya isa ka abyan agud magpaliwa-liwa sang nahubog ang iya nga mister.
