ROXAS CITY – Pilason ang mga sakay sang duha ka motorsiklo matapos ang pagbungguanay sa National highway sang Barangay Calaan, Panit-an, Capiz, kahapon nga adlaw, Mayo 5.
Ginkilala ang mga biktima nga sanday Wel Mark Bialen, 27-anyos, driver sang Yamaha MIO nga motorsiklo, angkas ang iya mag-iloy nga sanday Mary Grace Bialen, manunudlo kag ang 2-ka tuig nila nga bata nga lalaki, lunsay mga residente sang Poblacion Ilaya.
Samtang, ang driver sang nakabunggo nga motorsiklo amu si Andrew Depedra, 22-anyos kag ang backriders sini nga sanday Joselito Distor, 44-anyos kag Rojen Aldren Magbanua, 22-anyos nga lunsay mga residente sang Barangay Conciencia, lunsay sa banwa sang Panit-an.
Sandig sa inisyal nga imbestigasyon sang mga katapo sang Panit-an MPS, nga samtang ginasubay sang mag-asawa ang dalan nagikan sa Brgy. Ambilay papuli sa Pob. Ilaya, sang aksidente ang mga ini nga nabungguan sang nagasunod sa ila nga motorsiklo.
Bangud diri, nagkalatumba ang duha ka mga motorsiklo kag nag-angkon sang kapilasan sa lawas ang mga sakay, nga gilayon gindapatan sang pauna nga pagbulong sang mga katapo sang responders.
Samtang, ginpadangat sa isa ka pribado nga ospital ang driver sang MIO kag sa Bailan District Hospital gindala si Depedra.
Nahibaluan nga yara sa impluwensiya sang makahulubog nga ilimnon ang driver sang nakabunggo nga motorsiklo.
Ginkustodiya sa Panit-an MPS ang magtimbang nga motorsiklo para sa nagakaigo nga disposisyon.
