PANITAN CAPIZ – Personal nga nagpadulong sa talatapan sang Bombo Radyo Roxas ang mag-asawa nga sanday Mr. Joey isa ka CVO kag Mrs. Kela Joy Delay nga Barangay Health Worker (BHW) sang Barangay Cabugao, Panitan Capiz agud ireklamo ang ila Punong Barangay nga si Rosemarie Detablan may kaangtanan sa ginapahayag nga pagpili sini sa pagpanglista para sa cash assistance sa ila lugar.
Suno sa mag-asawa nga madugay na sila nga nagserbisyo sa ila barangay apang palamangkutanon sini nila nga wala sila gindala sa listahan sa programa ni Congressman Howard Guinto nga cash assistance.
Ginpahayag pa nanday Delay nga ginbuhinan pa ni Detablan ang kwarta nga ginabaton sang mga benepisyaryo sang tig-P200.00 para suno diri gastuon sa pagpabutang sang pinta sa ila barangay hall.
Bangud sini, nagpasimpalad nga magkomentar sa facebook page ni Cong. Guinto si Kela Joy agud pamangkuton kung ngaman wala madala sa ayudad ang mga CVO sang barangay.
Kabangdanan nga isa sa mga rason nga ginalantaw sang mag-asawa nga ginkaakig ni Detablan matapos ini nga makita.
Dugang pa sang mag-asawa nga nakabaton man sila suno diri sang pagpamahog nagikan sa ila Punong Barangay nga pahalinon sila sa pwesto bangud sa ila nahimo.
Nagalaum naman sanday Delay nga kun tani mahatagan ini sang pagtamod kag masabat ang ila mga palamangkutanon.
Samtang, bukas naman ang istasyon sang Bombo Radyo Roxas sa mangin sabat sang nasambit nga Punong Barangay.
