Naghingyo sang dugang nga tyempo ang mag-tiayon nga Pacifico “Curlee” Discaya kag Sarah Discaya sa Independent Commission for Infrastructure (ICI) agud mapasa ang mga dokumento nga ginapangayo kaangut sang ginapatigayon nga imbestigasyon sa ginapahayag mga iregularidad sa pila ka mga flood control projects.
Suno kay Atty. Brian Keith Hosaka, Executive Director kag spokesperson sang ICI, gintalana na sa maabot nga Oktubre 15 ang masunod nga pagdinig kun sa diin ginalauman nga mapasa sang mag-tiayon nga Discaya ang mga ginakinahanglan nga dokumento.
Kadungan sini, ginpakigbahin man ni Hosaka ang ginpatigayon nga hearing sa atubang ni Senador Mark Villar, kun sa diin gintalakay sang senador ang mga nangin proseso sa sulod sang Department of Public Works and Highways (DPWH) sang siya pa ang secretary sini. Gin-athag sang ICI nga indi na pag-ipatawag liwat si Villar, bangud bastante na ang iya nga nangin testimonya.
Hugot nga ginpanginwala ni Hosaka ang mga alegasyon sang ginaalegar “cover-up” sa ginpatigayon nga imbestigasyon. Suno sa iya, determinado ang komisyon nga pasabton ang sin-o man nga mapamatud-an nga involved sa mga anomaliya sa flood control projects.
Padayon ang imbestigasyon sang ICI bilang kabahin sang tikang sang gobyerno agud masiguro ang integridad sang mga pampubliko nga proyekto kag insakto nga paggamit sang pondo.
