(UPDATE) – Indi tumandok sang Sitio Hacienda, Barangay Sublangon, Pontevedra, Capiz ang mag-asawa nga ginsulod sang mga armado nga kalallakinhan ang ila balay kag ginpangluthang-patay.
Sa interview sang Bombo Radyo kay alyas ‘Toto’ kasilingan sang mag-asawa nga sanday Reynaldo kag Fe Delgado, suno diri nga kapin lima pa lamang katuig nga nagaistar ang mag-asawa sa ila barangay.
Ini bangud taga Tabuc Sur, banwa sang Panit-an si Reynaldo, samtang tumandok sang Iloilo naman si Fe.
Pagsagod sang kasapatan kag pagpananom sang utan nga ila man ginabaligya ang palangabuhianan sang mga biktima, kag may yara ang mga ini sang nagaisahanon nga pito ka tuig nga bata nga lalaki.
Ginpahayag man ni alyas ‘Toto’ nga wala gid sila naglaum nga matabo ini sa mag-asawa bangud wala sila sang may nabatyagan nga motorsiklo ukon iban nga tawo nga nagpadulong sa sa ila Sitio, antes natabo ang krimen.
Ginkakibot nalang nila kagab-i mga alas-7 ang kapin anum ka asud-asod nga lupok sang armas-luthang kadungan sang paghinibi sang bata sang mag-asawa.
Ginpakamaayo sang mga ini nga indi gilayon magguwa sa ila balay sa kahadlok nga basi maulamid pa sa insidente.
Apang matapos ang kapin 5 ka minutos, nagguwa ang mga ini apang wala na ang mga suspek, kag nakit-an nga wala na sang kabuhi si Reynaldo samtang nadala pa sa ospital si Fe, nga sang ulihi ginbawian man ini sang kabuhi.
Ginpahayag nga sandig sa inisyal nga imbestigasyon sang mga kapulisan, posible nga sa likod nga bahin sang ila balay nga ginapalibutan sang uyapad kag katubohan nag-agi kag nagpalagyo ang ginatudlo duha ka mga armado nga lalaki.
Narekober sa lugar ang anum ka baseyo sang ginapatihan .45 calibre nga armas-luthang, kag nagapadayon pa ang imbestigasyon sang mga kapulisan angut sa insidente.
