ROXAS CITY – Pilason ang mag-lola matapos maaksidente sa ginasakyan nga motorsiklo sa national highway sang crossing Dalhog, Barangay Salocon, Panit-an, Capiz.
Ginkilala ang driver sang Honda wave 125 nga motorsiklo kay Arsenio Flotildes, 67-anyos kag mga backriders sini nga sanday Cristita Flotildes, 72-anyos kag apo nga lalaki naga-edad 7-ka tuig, lunsay mga residente sang Brgy. Intampilan.
Samtang ang driver sang Kawasaki Bajaj nga motorsiklo amu si Rolly Cosca, 66-anyos, residente sang Brgy. Salocon, lunsay mga taga-banwa sang Panit-an.
Sandig sa inisyal nga imbestigasyon ni PCpl. Carl Bryan Albisor, nagapadulong ang driver sang Wave sa Brgy. Salocon, agud magbakal sang itlog, apang sa tion nga magaliko na ini sa amu nga barangay, aksidente nga nasangit sang driver sang Bajaj ang backrider nga si Cristita, rason nga natumba ang motorsiklo nga ginasakyan sini.
Nag-angkon sang pilas sa natuo nga tuhod ang tigulang nga babayi, samtang menor nga gasgas sa lawas ang naangkon sang bata nga lalaki.
Wala naman napilasan ang driver sang Wave kag Bajaj.
Ginpadangat sang mga katapo sang Panit-an ERT sa isa ka pribado nga ospital sa syudad ang babayi nga senior citizen.
Ginkustodiya naman ang duha ka mga motorsiklo sa Panit-an MPS samtang nagapadayon ang imbestigasyon.
