ROXAS CITY – Malipayon nga gindul-ong sang mag-asawa ang ila bata sa kindergarten, sa una nga adlaw sang klase, sa President Manuel Roxas Memorial Integrated School-South, subong nga adlaw sang Lunes, Agosto 22.
Sa pagpakig-angut sang Bombo Radyo kay Mrs. Jessica Bermejo, taga-syudad sang Roxas, suno diri nga ’full force’ sila sang iya nga bana sa pagsuporta sa ila bata, nga first time magsulod sa klase.
Ginpahayag pa sini nga makita niya man ang pagkalangkag sang ila bata nga magpadulong sa eskwelahan bangud aga man ini nagbugtaw kaangay sa iya.
Nagapati ang nasambit nga Iloy nga dako ang papel sang manunudlo sa pagtuon sang ila bata, kag nagpasalamat ini sa ginahimo nga effort sang nagasrbe ika-duha na nga ginikanan sang ila bata, agud nga maganahan sa pag-eskwela ang ila kabataan.
Nahibaluan nga alternate ang face to face classes, kag sa aga lamang ang ila klase.
Pagahulaton man sang mag-asawa nga matapos ang klase sa subong nga aga sang ila bata.
